टाकळी हत्याकांड: “पोलिस कोणाला वाचवण्याचा प्रयत्न करतायत?” आमदार धनंजय मुंडेंचा संतप्त सवाल. घुले-माने कुटुंबियांच्या न्यायासाठी रस्त्यावर उतरण्याचा इशारा!.
टाकळी हत्याकांड: “पोलिस कोणाला वाचवण्याचा प्रयत्न करतायत?” आमदार धनंजय मुंडेंचा संतप्त सवाल.
घुले-माने कुटुंबियांच्या न्यायासाठी रस्त्यावर उतरण्याचा इशारा
केज (प्रतिनिधी ) :
चार दिवसांपूर्वी केज तालुक्यातील टाकळी परिसरात झालेल्या दुर्दैवी आणि निर्घृण हत्याकांडाने संपूर्ण परिसर हादरला आहे. या घटनेत मृत्यू पावलेले स्व. विलास घुले यांच्या कुटुंबियांची आज राष्ट्रवादी काँग्रेसचे नेते तथा आमदार धनंजय मुंडे यांनी टाकळी येथे जाऊन भेट घेतली व त्यांचे सांत्वन केले. या भेटीनंतर प्रसारमाध्यमांशी बोलताना आमदार मुंडेंनी पोलिस प्रशासनाच्या कारभारावर तीव्र संताप व्यक्त केला असून, “न्याय न मिळाल्यास प्रसंगी रस्त्यावर उतरू,” असा इशारा दिला आहे.
ॲट्रॉसिटी आणि निर्घृण खून: नेमकी घटना काय?
मिळालेल्या माहितीनुसार, आरोपींनी संगनमत करून सामान्य गरीब कुटुंबातील उमेश माने या तरुणावर आधी जीवघेणा हल्ला केला होता. हा हल्ला होत असताना, त्याला वाचवण्यासाठी विलास घुले हे मध्ये पडले. मात्र, आरोपींनी अत्यंत क्रूरतेने विलास घुले यांचा निर्घृण खून केला.
या घटनेनंतर धक्कादायक बाब म्हणजे, न्यायासाठी रस्त्यावर उतरलेल्या पीडित कुटुंबियांना विलास यांचा मृतदेह घेऊन तब्बल तीन दिवस तिष्ठत बसावे लागले. प्रशासनाच्या या उदासीनतेवर बोलताना धनंजय मुंडे म्हणाले, “पीडित कुटुंबाला मृतदेहासह तीन दिवस न्यायासाठी ताटकळत ठेवावे लागणे, हे अत्यंत क्लेशदायक, दुर्दैवी आणि संतापजनक आहे.”
SIT तपासावर कुटुंबीय असमाधानी; पीडितांनाच धमक्या!
या संपूर्ण प्रकरणाच्या तपासासाठी प्रशासनाने स्वतंत्र ‘SIT’ (विशेष तपास पथक) समिती स्थापन केली असली, तरी घुले कुटुंबीय या तपासावर अजिबात समाधानी नाहीत. उलट, पीडित उमेश माने आणि विलास घुले यांच्या कुटुंबियांनाच सध्या धमकावले जात असून, त्यांना वेगवेगळ्या खोट्या केसेसमध्ये गुंतवण्याचा प्रयत्न केला जात असल्याची धक्कादायक माहिती कुटुंबियांनी आमदार मुंडेंना दिली.
”जाती-पातीच्या भिंती ओलांडून निष्पक्ष तपास होईल का?”
“एकूण तपास प्रक्रियेत पोलिस यंत्रणेमार्फत कोणाला वाचवण्याचा प्रयत्न होतोय का? जाती-पातीच्या भिंती ओलांडून निष्पक्ष तपास केला जाईल का? याबाबत मनात मोठी शंका आहे. या गंभीर विषयावर आवश्यकतेनुसार मी पुन्हा एकदा विधिमंडळ सभागृहात आवाज उठवेन.”
— आ. धनंजय मुंडे
’डंप डेटा’ तपासा; अन्यथा आंदोलनाचा इशारा
आमदार धनंजय मुंडे यांनी पुढे स्पष्ट केले की, “कुणाला मुद्दामहून अमुक एखाद्या गुन्ह्यात अडकवा, अशी माझी अजिबात भूमिका नाही. मात्र, सर्व साक्षीदार, वस्तुस्थिती आणि घटनेच्या वेळचा ‘डंप डेटा’ (Call Dump Data) अशा सगळ्या तांत्रिक गोष्टी तपासून योग्य व पारदर्शक तपास व्हावा, हीच आमची अपेक्षा आहे.”
या प्रकरणात जर पोलिस यंत्रणा कमी पडली किंवा आरोपींना पाठीशी घालण्याचा प्रयत्न झाला, तर घुले आणि माने कुटुंबियांना न्याय मिळवून देण्यासाठी कोणत्याही थराला जाऊन, प्रसंगी रस्त्यावर उतरून तीव्र आंदोलन छेडले जाईल, असा इशाराही आमदार मुंडे यांनी दिला आहे.
मुख्य संपादक :-श्रीराम तांदळे
